يبي ياقف شعر راسي ليا قالوا ولد رجال=لأني أفتخر باسمك وأفضالك علي ( يابه)
وانا باقي على خبرك إذا شفت الحمول ثقال=أدور ما ينومسني واتل الذيب بانيابه
وانا يابه على الهقوه ادوّر خوة الأبطال= ولا دوّرت لابن اللاش أو ناظرت في بابه
ومثل ما قلت لي حب الوطن واحرص تعاهد آل=سعود انا معاهدهم بوجه الله وكتابه
ومثل ما قلت لي احرص على الدله على الفنجال =انا ابشّرك بالمجلس دلال الضيف وزهابه
ومثل ما كنت ترحمنا وتعطف يوم كنّا اطفال=ابا اخفض لك جناح الذل لأنك أنت أولى به
أنا محزمك يالغالي إذا جار الزمن أو طال=وابا عاهدك لا خان الردي وبار بأصحابه
أنا يابه احبك حب لو ينثر على العقّال= تفيض قلوبهم رحمه وكلا(ن) يحسب حسابه
وإلا مني خسرت المال أنت بدنيتي المال=وإذا خلّوني اللابه حزامي أنت واللابه
أنا من لي سوى ظلك إذا ظل السحابه زال=ومن لي لاظلمت دنياي غيرك أنت أحيا به
جعل يومي قبل يومك اله الحل والترحال=وجعل ما يفقدك قلبي لأنك نور أحبابه
إذا صلّيت ادعي لك وإذا خلّصت دمعي سال= لأني مبعد(ن) عنّك ذكرت البعد واسبابه
وذكرت ان السنين تمر والفرقا تهد الحال=وانا متمسّك بديني وجرح وقلب أشقى به
قساوة دنيتي يابه تهد من الجروح جبال=وقلبي للأسف صارت خيوط اليأس تنتابه
أبي دعوتك يالغالي إذا حظي جفا أو مال=وابي وقفتك لا خانوا عهودي ناس حرّابه
تحذّرني تعلّمني تقول احذر من الأنذال=وخاف الله في نفسك ترى اللذّات غلابه
وانا يابه ورب البيت أأدّي صالح الأعمال=واخاف الله في نفسي مادام النفس توّابه
وعلى خشمي انا ببقى وفي راسي علوم رجال=لان الذيب ما يعوي سوى في راس مرقابه
وانا يابه على خبرك إذا شفت الحمول ثقال=أسويها وانا يحيــى وناري دوم شبّابه