بعد المواضيع الاخيرة بالمنتدى والكلام اللي فيه زين وشين اكتب الى ربعي ذا القصيدة واتمنى انها تكون نقطة تحول وتلاحم بين الشعراء اخواني واحبائي والادارة والاعضاء اللي بأسمائهم الصريحه واللي بأسماء مستعاره الله يوفق الجميع كنت اتمنى اني اعرف بعض الاسماء المستعاره لكي اتشرف بذكرهم بالقصيده ولكن يعذروني وكلهم على راسي والله اني صادق
صلوا على النبي
بديت القول باسم اللي نهابه=إلهي خالق افلاك(ن) تشابه
وبعد ذكر الولي اثني واصلي=على محمد وآله والصحابه
بعدها جيت بالدّر المثايل=شعر من منطلق ربع وقرابه
تجمّعنا وحن ربع(ن) نشاما=على العز وعلى مبدا الذّرابه
جمعنا الذيب ( ابن غرزه) وانا اشهد=بأن الطيب مصفوط لجنابه
و(ابن بهرر) و( ابن زعرر) عساهم=على القوّه حلاحيل وذيابه
و( ابن جونان) و(ابن مليح ) ربع(ن)=تدرّس فن واتقان الكتابه
وسلامي ل(الرويعي) تاج راسي=ذرى المضيوم لا جا عند بابه
ول(ابو شوق) ول(ابو زايد) سلامي=عدد مالاح برق(ن) في سحابه
وسلام الله سلام لكل نشمي=وزن منطوق ردّه والاجابه
يشرف لابته في كل محفل=أبالحارث قروم وخير لابه
أبالحارث صناديد الجزيره= ولدهم باللقاء فعله زهابه
(سل التاريخ ينبئك بمجد(ن))=زمان(ن) كانت الدنيا نهابه
يجمّل فعلهم (يحيى) وغيره=يجمّل أسمهم يوم أعتزابه
وانا ياناشد(ن) عني تراني=ولد ذيب(ن) عوى ثم بان نابه
سرى للشرفه وجاب الغنايم=حمى أرضه (وراس غليس) جابه
ابوي وتاج راسي وافتخر به=أبوس أيديه واقبّل ترابه
ولي اخوان(ن) ينومسني نباهم=فديت ارجيلهم درع وعصابه
كتبت الشعر والناس تعرفني=على وضح النقا شعري صفابه
ولاني والله بشاعر قبيله=انا شاعر ولي قدر ومهابه
واذا كان اللقب يمنح لقدوه=ف( أبو عادل) جدير(ن) يقتدابه
وعلى كلا(ن) أقدّم إعتذاري=إذا في يوم زوّدت الحرابه
يحز بخاطري لاشفت ربعي= يخالط جوّهم جو الكأآبه
وانا والشعر والالقاب فدوه=مدام ان الشعر يحسب حسابه
وختام القول ياغالين صلّوا=على محمد وآله والصّحابه
وسلامتكم واعذروني على القصور لاني كتبتها في وقت قصير وحبيت انها توصل لقلوبكم بدون تعديل او تنقيح