يكفــــــــــــــي كل قصيده شرفا ان تكون في مدح اشرف الخلق وهذه قصيدة الشاعر ناصرالفراعنه ويقولون انها 800بيت وفيه يقولون انها1000بيت بس اللي قدرت انقلها لكم هي التاليه
الله يـا نـور مـن جبـال فــاران= بـان وتـروع منـه عبـاد الاوثـان
نور الهدى يا معشر الإنـس والجـان= نورٍ تـلالا وأهـل مكـة يشوفـون
فيـضٍ مـن النـور الإلهـي تـلالا= أيــات ربٍّ للخـلايـق تـتـالـى
بأمـره تعالـى صـوت حـق تعالـى= وقريش في ميت صنمهـم يصيحـون
له من قبل يولـد علامـات ورمـوز= رؤيا ملوك الفرس فـي يـوم نيـروز
ومنها اصطفاق الماء على رملـة القـوز= وشمشون ما هو مثله الأمس شمشـون
ساعة ظهر نجـم أحمـدٍ مـا تـوارى= منـه اليهـود استنوقـوا والنصـارى
يوم أقفوا من الغيظ مثـل السكـارى= كل على كبده مـن الغـل طاعـون
نجمٍ ظهر للعين مـن مطلـع الشـرق= بينه وبيـن نجومهـا الطالعـه فـرق
ساعة ظهر غنّت على عشهـا الـورق= ترقب جموع الناس مـن أيـن يأتـون
وصار استراق السمع ما هوب جايـز= وتحركـت وسـط القبـور الجنايـز
وتلمسـن لصـدورهـن العجـايـز= وأهل الكتاب من القهر مـا يريحـون
ورؤيا ربيعة نصر عمـرو بـن عامـر= قـبـل ولادة أحـمـد والعـوامـر
منها رمـت فرسانهـا كـلّ ضامـر= ما هيب مثل أضغاث الأحلام وظنـون
يـا حمـةٍ فـي ظلمـةٍ فـي تهـامـه= علـم بهـا ( التبّـع ربيعـه ) عمامـه
وعنها ألف قامه ناشدوا وألف هامـه= من جن وانس وأهل الأخبار يـروون
طفل وهو مـن قبـل يكبـر وينمـو= له في السماء كل كوكبٍ بـان يزمـو
الناس تنزل تحـت والطفـل يسمـو= طفلٍ غبطه العـز موسـى وهـارون
( سطيح ) فسرهـا و ( شـقٍ ) كذلـك= إن الممـالـك تنتـهـي للمهـالـك
ويسودها ابنٍ لإبن فهـر بـن مالـك= عقب أربع قرونٍ تلتها أربـع قـرون
وحلمٍ رواه العبد عمـرو بـن مـرة= عن كوكبٍ يضفي على بطـن حـرة
وصوتٍ يقول اطمر ورا كـلّ جـره= للي لكم من غاديات الدهـر جـون
ساعة ولادته أشرف الشمس أبو وهب= ليلٍ ولا أخطت شياطينهـا الشهـب
الخوف خلى كاهنٍ مـن بنـي لهـب= يؤمن عقب شاف أسفل العرش مصيون
ساعة ظهر نجمه كمـا قـال حسـان= كل اليهـود موقفيـن علـى شـان
نجمٍ يزلزل حومـة الشـرك مـن دان= وابن أخطبٍ كنه علـى راس حجـون
وفي ارتجاس إيوان كسـرى علامـات= طيحة وثنهم مع سقـوط الشرافـات
ورؤيا رآها الموبـذان وهـل الـلات= دلالـةٍ منهـا لحـق ربهـم هــون
وفي خبر ( قسّ بـن سعـد الإيـادي )= وزيد بن عمـرو واعتـراض المبـادي
وأربع رجالٍ من مضـر مـا تقـادي= بإسم أحمدٍ لأطرف ولدهـم يسمـون
في عام ست ميـه وواحـد وسبعيـن= تاسع ربيع أول وفـي صبـح الإثنيـن
ميلاد أكرم من وطى القاع يا حسيـن= طفـلٍ عليـه الله وخلقـه يصلـون
يوم أنجبته أمه عقـب طـول مسـرى= من نور وجهه شافت قصـور بصـرى
وتحطمت صلبـان قيصـر وكسـرى= وأصبح هرم فرعون ما سـر فرعـون
قالـوا ملائكـة السمـا يـا أمينـه= سمـي ولـدك أحمـد وحبـي يمينـه
وعيذيه بالله مـن حسـد حاسدينـه= ( إنا سنجعل منـه مصبـاح للكـون )
هـذا النبـي الهاشـمـي الـنـزاري= فجرٍ سنا صبحـه يبـوج الغـداري
نـور النبـوه فـي محيـاه جــاري= مصباح أهل الأرض يا أهل الصنم عون
في يوم ميـلاده توفـوا هـل الفيـل= وكاهن هل البصره وكاهن هل النيـل
وشافوا هل الساحل طواقي هل الغيل= من نور وجهه والقمـر دون فـي دون
في مولده يا حسين من ضمن الاّيـات= من أبطن الأصنام يخرجـن الأصـوات
من هاتفـات الجـن وكـل آتـيٍ آت= ياللي تعاتـب عنـد دمّـون دمّـون
تقول فاطم بنت عاص أمّ عثمـان := ليلـة ولادة أحمـدٍ شانـهـا شــان
يكاد نـورٍ منـه يذهـب بالأعيـان= وخفت الكواكب فوق راسي يطيحون
لا جيت ألفه باللحاف انقلـب عنـه= كن الكواكب فـوق تبغـى تعاينـه
وصارت أواني البيت مثل الذهب منـه= وشفت الوسايد يزحفن له على هـون
يـا فاطمـه هـذا النبـي المسـمـى= باكر يجيك الصبح بـ ( إقرأ ) و ( عمّـا )
أمـا مـن استكبـر فـ ( نـارٌ ) وأمّـا= من اهتـدى فيبشـر بتيـن وزيتـون
مـا جـاء مـن سفـاحٍ ولا قالـه الله= جاء من نكاحٍ حسـب مـا سنـه الله
يوم العرب في ملكـة الشـرع قلـه= وأغلب مناكحهم زنـا لـو يعـودون
هـذا بـن عبـدالله نسـل الأكـارم= والجد عبـد المطلـب بـن هاشـم
ابـن منـاف ابـن قصـيّ المغـانـم= ابن كلاب الخيـر والخيـر مضمـون
وكلاب بن مره ومـره بـن كعْـب= ابن لؤيّ الحرّ بـن غالـب الصعْـب
وغالب بن فهرٍ وفهـر مهـو لعْـب= وفهرٍ لقبـه قريـش ياللـي تعـدون
بن مالك بـن النضـر بـن كنانـه= ابـن خزيمـة بـن مـدرك زمانـه
اللـي ثنـى دون الضعينـه حصانـه= منه أهل وادي الحمض والخمض يخشون
ومدرك هو بن الياس بن عالي الشـان= مُضر هو أول من حدا قدم الأظعـان
ابن نـزار بـن معـدّ بـن عدنـان= وعدنان في اسماعيل بعد أربـع بطـون
ابـن براهيـم الخلـيـل بــن آزر= أهـل المقـام المرتضـى والمـيـازر
خلْ عنك حكي أولاد بطرس وعـازر= ما هم بحوله في الشرف لـو يطولـون
واتـرك يهـود الدونمـا والخـزريـا= لو حاولـوا بأصلـه يحولـون الأريـا
إن مـا سقينـا كلبهـم مـرّ شريـا= والا ترانا مثل أبـو الهـول ملعـون
ابـن الذبيحيـن أحمـدٍ لـو تعالـوا= ياللي علـى جحـدة محمـد تمالـوا
تعالوا إلـى كلمـةٍ سـواءٍ تعـالـوا= وحاذور عن شمـس الحقيقـه تميلـون ؟
يا أهل الكتـاب الله عطاكـم كتابـه= وإسم محمـد فيـه مـا هـو تشابـه
ولا زال باقٍ عنـه بعض الكتابـة= غير اللـي أخفيتـوه عنـا وتـدرون
يـا ليتهـم جهالكـم بـسّ تـدري= باللي فعلوتـه أول الوقـت بـدري
إن كان قدني منكم أشفيـت صـدري= وأظهرت باطلكم لكم لـو تروغـون
بأذكر بعض ما عندكـم عـن محمـد= في كتبكم يا أهل الصليـب المصمّـد
بتوراتكـم وانجيلكـم عـن تعمّـد= أخفيتوا إسم أحمد مع أولاد صهيـون
أغواكم إبليـس بتحريـف الآيـات= كتمتـم الآيـات كتمـان الأمـوات
ما مات شيء فات يـا ناقـد الـذات= الحـق باقـي منـه حلـق ولغنـون
يا أهل الكتاب اللي حرفتـم حروفـه= تحريفكـم خلـى عيونه بجـوفـه
وتزويركـم كـلٍّ بعينـه يشـوفـه= وشلون تخفونه عن النـاس وش لـون
أحمـد عرفتـوه بعلامـات جسمـه= وبكتابكـم مذكـور بإسمـه ورسمـه
والخاتم اللـي بيـن الأكتـاف وسمـه= شفتوه شوف العين وش عـاد تبغـون
حـق البكوريـة كتمـتـوه عـنـاّ= وسقتوه لأنفسكم بـلا ذنـب منـا
غصـبٍ عليـنـا إنّ بـالأمـر ( إنَّ )= وهذا الصحيح وقولوا اللـي تقولـون
يا أمة التـوراة وأصحـاب الإنجيـل= أحمد ذكـر فيهـا بـأدق التفاصيـل
يا مقرطسين الصبح فـي ظلمـة الليـل= أدلتـي جتكـم عساكـم تـوحّـون
في سفر ( حجّي ) من ثنيـنٍ لـسبعـه= جاء ذكر أحمد وأهل الإسـلام ربعـه
وفي لفظ ( حمْدَهْ ) فـي ثلاثيـن طبعـه= لكنكم عـن كفركـم مـا تتوبـون
وفي سفر ( دنيالٍ ) بسابع فصـل منـه= حلمٍ تحلم بـه وطـار الكـرى عنـه
حلـمٍ يـأول منـه ظاهـرْه باطنْـه= ما هو حكـي ولادةٍ وبـن زيـدون
يوم ايحلم ( دنيـال ) بأربـع عواصـف= في وجه بحـرٍ مـا يوصّفـه واصـف
موجه عليه أربـع وحـوش تراصـف= متساويات اعيون واظهـور وبطـون
ليـثٍ مجنـح مثـل مـا تذكرونـه= ودبًّ ثلاث ضلـوع حسبـة سنونـه
ونمـرٍ بأربـع أجنحـه تاصفـونـه= وإربع رؤوسٍ بـلا كراعيـن ومتـون
ووحشً قرونـه أربـع فـوق راسـه= ثم يظهر الحادي عشـر مـع أساسـه
ويكسر ثلاث قرون مـن قـوّ باسـه= ويصير مثـل الآدمـي فـمّ وعيـون
وبالكفـر والالحـاد يبـدا يتـفـوه= تـوه بـدا وبغايـة الشـرك تــوه
قرنٍ براس الوحـش شكلـه مشـوه= كنه شرب من خمرة الـراس جالـون
وفجأة يجي الله فوق عرشٍ مـن النـور= عرشٍ سنا نـوره تقـل فـت بلّـور
قدمه يرى نهـرٍ مـن النـور منثـور= حوله ملائكـة السمـاوات يمشـون
ثم يفتحون الكتب مـن كـل خانـه= والوحش ابو قرون احترق في مكانـه
كله يمـوت الا هـك القـرن عانـه= يدعو خلفهم للكفـر ليـن يدعـون
يدعون من جات السحايـب تشيلـه= يمثـل أمـام الله ويرخـي شليـلـه
ويعطيه ملـكِ مـا يوصـف مثيلـه= وتخضع له الدنيا اجمـعٍ روس وقـرون
هو أحمد الخاتم وهـو ابـن الانسـان= في لفظ ( برناشا ) لو انْ فيكـم اذهـان
وتفسيرها في كتبكـم خيـر برهـان= إنه محمـد , لـو تروحـون وتجـون
وما قال فيه اكبر كهنـة آل كلـدان= ( دافيد بنجامين ) قـسّ اهـل ايـران
أكبر دليـلٍ لـه يزوغـنّ الأذهـان= وإلا على ويش اهتدي هـو وخاتـون
قال : بن الانسان أحمدٍ ما تبـي شـور= والقرن قسطنطين لآبـوه مـن ثـور
اللـي بـدا التثليـث دورا ورا دور= وصرتوا معـه باللـي ينـادي تنـادون
وابليس منكم لبّس اثنـا عشـر قـس= ثوب الخزى ما هو حريـرٍ وسنـدس
يا ليت فيكـم بـسّ مثـل المقوقـس= يحفـظ لسانـه مـن علـومٍ تجيبـون
وفي سفر ( شعيا ) فصل ثاني وعشريـن= صفة محمد مع هـل الخـف والقيـن
وجبال مكـه والحجـر والحجازيـن= لكنكم عـن مكركـم مـا تجـوزون
وفي سفر ( عوبديا ) وفي سفر ( حزقيـل )= وفي سفر حبقوقٍ وفي سفر ( صمويـل )
وأربع طعش سفرٍ عدا كل مـا قيـل= فيها أحمد مذكور بالشكـل واللـون
واما وفـي العهـد الجديـدُ لديهـم= فـي كتبهـم ألفيـن شاهـد عليهـم
وما جاءنـا منهـم سيرجـع إليـهـم= وقسيسهم من أكله السحت مبطـون
في سفر ( يوحنا ) و ( لوقـا ) و ( متّـى )= وفي سفر ( مرقس ) والروايـات شتّـى
عن أحمدٍ مـا يثلـج الصـدر حتّـى= ينام طيـب حـال والوجـه ميمـون
أحمد هو الطفل اليتيـم اللـي أخفـوا= ذكره , وهم في عهدة الرب ما اوفـوا
لله طفـلٍ ساعـة النـصـر يعـفـو= طفـلٍ وهـو لمدوّرالعـون ماعـون
هاك اليتيم اللي على جانـب العـرش= مكتوبٍ اسمه بأمر من يحيـي الطـرش
منجي غريق الموج من عضة القـرش= فـي غبـةٍ سباحهـا مـا يعـومـون
وقولة ( بحيرى ) عنـه لأقـرب عمامـه= عـن شـأن طفـلٍ ظللتـه الغمامـه
عليـه شـاف مـن النبـوّة علامـه= وقال اجنبوا به من قبـل لا تضيعـون
اللي لقت فـي قربـه أمـه حليمـه= غنيمـة يـا كبرهـا مـن غنيـمـة
وهي قبل قربـه لاش خيمـه وغيمـه= عيالهـا مـن شـدة الجـوع يبكـون
طفل ملائكـة السمـا فـي فـؤاده= حطوا له الثلجـه عـوض للسـواده
شقوا صديـره وهـو طفـل وعـاده= صغير ما يدري عـن اللـي يحطـون
هاك اليتيم اللي غشت وجهها الشمس= ومشاعره خطرٍ عليهـا مـن الهمـس
وبرغم ذا ما حشموها عـن اللمـس= لمسة رماح أبنا عمامه لـدى الكـون
وبالرغم مـن هـذا ترضـى عليهـم= وتحمـل أكبـر غلطـةٍ مـن بنيهـم
ولا طاوعه ضامـره يدعـي عليهـم= ولو دعى راحـوا كمـا راح قـارون
هـاك اليتيـم اللـي عيونـه تقاطـر= رحمـه لقومـه كالمـزون المـواطـر
لعيونهـم شـال الأذى والمخـاطـر= ما كنْ بلقبه مـن أذى سبهـم لـون
في ذمتي ما فـي أنبيـا الـربّ مثلـه= شال الأذى من لابتـه وسـط حثلـه
حباً وهم بالشيـن كـلٍّ بعـث لـه= ورعٍ يضيق خاطـره كيـف يرضـون
يا ويل قلبـي كيـف يرضـون سبـه= ومثـل هـذا مـا تجـيـه المسـبّـه
للرحمـه أنشـا حبّـةٍ فقـو حـبّـه= وخلى عجمها مع عربهـا يتخـاوون
ما به نبـي إلا ودعـى بمـوت قومـه= وهو ما لقى ما قد لقى احمـد بقومـه
على كثر مـا شينـوا مـن علومـه= دعـى لهـم بالخيـر فيمـا يريـدون
آذوه في نفسـه وهـو مـا أذاهـم= يـا كثـر والله مـا تحمـل خطاهـم
إليـن ربـي لأجـل أحمـد هداهـم= لكنهـم جحـادة مــا يـوفـون
ربي من الرحمـه خلـق جسـم أحمـد= بثلجـةٍ فـي واقـر الصـدر تجمـد
منهـا عيـون مـدور الشـر ترمـد= لا سلـم الله عيـن نـاس يتعامـون
لبعثتـه يشهـد سـواد بـن قـارب= ومشـارق الأيـام قبـل المـغـارب
وحمـر النجـوم كلابهـا والعقـارب= وأسقف أهل نجران والكذب مركـون
وهرقل والعبد بـن نوفـل وعاتـك= والجن يا هاتـف خريـم بـن فاتـك
يـا مـدوّر جـرة بعيـرك وشاتـك= الخير قدمك في أحمـدٍ سيـد الكـون
وعباس بـن مـرداس وراع النعامـه= وذباب بن حـارث وسـادن حرامـه
وشيخ الجزيره يـوم يكـد كلامـه= وقيصر وراع الأسكندريـه وقيمـون
وهذا مخيريـق اليهـودي شهـد لـه= وحبر اليهود بـن سـلام قعـد لـه
وعيضا وابن صـورٍ كنانـه وجعلـه= في النار يوم أجنب عن الحق مشحـون
في عصمته قد جاء ضمن الأحاديـث= ما ينجي السرحان من سطوة الليـث
وما يروي الظميان من ساقـي الغيـث= وما يوقد الجمره علـى راس غليـون
ربي عصمه من الحمايـا وأبـو جهْـل= بمجرّد مـا هـو مجـرّد بنـي سهْـل
غضنفرٍ بيديه محض الصعـب سهْـل= عند المشاعر وأهـل مكـه يراعـون
والله عصم عبده وهو داخـل الغـار= بالخيط خيـط العنكبـوت أمّ عمـار
وأنثى حمامٍ فرخهـا مـا بعـد طـار= وقريش حوله فـي الفـلاة يتعاشـون
وفي هجرته حاميه واليـه مـن قـرب= بالقرم ابن عمه علـي سيّـد العـرب
وأعمى له أبصار الملاعين فـي الـدرب= عن جرته وقريشـه جنبـه يطوفـون
وأبـو لهـب تبّـت يدينـه وتبّـت= حرمته يوم ان جمرة نارها منـه شبّـت
جت عند أبو بكر وهاجـت وسبّـت= ما تدري إنه جنب أبو بكـر محصـون
سبحـان ربٍ عنـه أعمـى بصرهـا= وقريش عند الحجـر هـدت عفرهـا
وفي حجرهـا ربـي رماهـا بحجرهـا= شافوه وأقفـوا جعلهـم مـا يثنـون
عطـاه ربـي هيبـةٍ فـي القلـوبـي= من روعها تـزول الأمـم والشعوبـي
ومنها تهـاوت كـل دولـه ولوبـي= هذي نبي الله وابـا الشيـن مشيـون
ومن نضر بـن الحارثـه ربـي انجـاه= في ثنيـة الحجـون يـوم الله أعمـاه
لين التراب مـن المهانـه مـلا فـاه= بأسود حيايـاً أقـرعٍ يـوم يلقـون
وربي حماه مـن ائتمـار بـن عثمـان= شيبه وهم بأسفل حنين أهـل سلفـان
بشوظ نارٍ من خـلاف آبـو سفيـان= كأنـه البـرق الـذي يستخيـلـون
وفي يوم أحد حلمه بكبـش الكتيبـه= وسهومهم من صوبـه ازرت تصيبـه
كما قال بن وقّـاص راعـي النجيبـه= حديث أعجب من حديـثٍ يحفظـون
ومن أهـل مكـه وحربـة سراقـة= ربـي عصمـه بـلا جـوادٍ وناقـه
ثـم بشـره بالخيـل تاطـا عـراقـه= وكنوز بابل مـن قواريـر وصحـون
هذا الذي قـال البـراء بـن عـازب= شفناه شوف العين ما هـوب كـاذب
يا أهل العروش الباذخـه والمواكـب= هذا حديث أحمد والأنـذال يخسـون
والله عصم عبده من الهيـس الأربـد= قيسٍ ومن راسٍ مثـل راس الأسـود
ابن الطفيل وكل مـن ضـاع ينشـد= سيفه بغمده وأعـور العيـن مدهـون
حقـق دعـاه الله بجنـح المـلائـك= والوضع من مكر أعور العيـن شائـك
والمؤمنيـن أحيـاء فـوق الأرائـك= ولو شفتهم فـوق الأسنـه يموتـون
والله عصم عبـده مـن أولاد مخـزوم= وابن المغيره بأملـح السيـف ملطـوم
يوم الكلاب استنهضت كنهـا البـوم= أحمد هو القايـم وهـم مـا يقومـون
ومن مرتزق قومٍ تجهّـز مـع قريـش= ربى عصم عبده من الخيـل والجيـش
أقفى كما ذايـر نعـامٍ مـع الحيـش= خبلٍ يحسب إن الوغى فلـم كرتـون
وعلى يهود الغـدر أبنـا النضيـري= ربي نصـر عبـده ونعـم النصيـري
أهـل الجـدار الله عليهـم بصيـري= وجدارهم جاء فوقهـم قبـل يرقـون
وربي عصم عبده مـن يهـود خيبـر= لـو إنهـم مثـل البراغيـث وأكثـر
ولو شاتهم مـن سمهـا حلوهـا مـر= أهل المكر في مكرهـم مـا يسـرون
وفي القبة الحمرا بقول ابـن الأكـوع= راع الفرس سيفـه بكفـه تسلـوع
يسقيك يا راع الخنـا كـاس خـروع= لو كان بأيدك مرهف الحـد مسنـون
ومـن بنـي أميـة قبـل يسلمـونـي= ربـي عصـم عبـده بتـوده وهونـي
يوم أصبحوا مـن هولهـا يركضونـي= دون الصفا من خوفهـم مـا يثـارون
ومن غدر أبو سفيـان هـو وبدويـه= الله حفـظ لـك يالبـريـه نبـيـه
ربـي حمـاه وصـاحـت الهاشمـيـه= لشوفة اللي شوفتـه تطـرب النـون
ومن الشجـاع معمـر بـن يزيـدي= ربـي حمـاه وكـل صايـح يهيـدي
جاله على رمضـا حصاهـا فديـدي= وقومه معه من روعهـم مـا يلـدون
ومنافقيـن القـوم غـزوة تبـوكـي= في رقة مـا بيـن عوشـز وشوكـي
أقفى فحلهم مـن وحمهـا يكوكـي= يوم إن حذيفـه والصحابـه يسالـون
والله عصمـه مـن الهـوام وعملهـا= ومن السباع وما دنـى مـن أجلهـا
ومـن السبايـا يـوم تركـز سبلهـا= من روحوا من ضربهـا مـا يعـودون
وعـن دعاواتـه وسرعـة لإجـابـه= ربـي عطـاه مـن الدعـا والمهابـه
ما لو درى بـه ثعلـبٍ وسـط غابـه= جا لأجل يدعي له على كل محيون
منهـا دعـاؤه للكـرام آل جعفـر= أهل الحراب الحمـر رمـح ومغفـر
يوم ازدحام النـاس والقـاع يصفـر= أضحو من المـال أغنيـاءٍ بـلا لـون
ومنها دعـاؤه للجريـر بـن عبـده= ودعاه للـي صلفـط الجـوع كبـده
ولا بن زيد وملحـة القـول زبـده= بدعا رسوله صار قاضـي وملسـون
ومنها دعاؤه لابن أبـي طالـب الفـذ= علي وهو لا ضاقـت النفـس منقـذ
قال اللهم اجعلهُ على الحـق جهبـذ= الين صـار أقضـى قضـاة يعدلـون
ويوم إن علي امتد طول الوجـع بـه= سهّل دعاؤه كـل عسـره وصعبـه
واشتد فـي قلـب المعاديـن رعبـه= الين صار أسطى هل السيف شامـون
وأصبح علي لا ضيقت قائد الحـرد= وأصبح خلاصة سادة السرد والشـرد
وعنه أذهب الله وعكة الحـر والبـرد= أبا الحسن به فـي الحـروب يتتقـون
وفي دعوته للعبد أنـس بـن مالـك= بالمال مـع كثـر الولـد والمسالـك
يـروي لنـا التاريـخ تأكيـد ذلـك= حسبي على مـن للحقايـق يكنـون
وإلا بن هشام بـل وزوجتـه زينـب= من فقرهم كانوا على كـور جنـدب
وصار بيديهم مجدب الأرض مخصـب= بيديهم الدرهم غـدا اليـوم مليـون
وللحر بن عوف بساعـة دعـى لـه= حدر العياله يـوم تبكـي عيـالـه
أغنـت يمينـه بالدراهـم شمـالـه= وأصبح على بيت من الفقـر مامـون
ومنها الثنيـن اللـي تفـرّق ظعنهـم= بدعا رسولـه عـودوا فـي وطنهـم
روت لنـا الأخبـار منهـم وعنهـم= سوالفٍ يسعد لهـا كـل مشحـون
واللي من الأنصـار يطلـب حرامـه= كمـا روى فـي قولـه آبـو امامـه
خلاه مـن أهـل التقـى والامامـه= وعاف الزنا واللـي عليـه يتلاقـون
وسهم سعد مـا يخطـي الـراس لله= وأويس ما تخطـي أبـد دعـوةٍ لـه
ولعمروٍ بـن الحمـق فـي شبـةٍ لـه= ما شيف شيبـه ليـن مـرت ثمانـون
وللعود ابو طلحـه وزوجتـه أيضـا= مـات الغـلام ورايـة الحـق بيضـا
واصبح لهم مع غيضة القيـظ فيضـا= ويبشـرون بتسعـةٍ مـا يحـاكـون
ولابـن قيـس يـوم كـدر مزاجـه= طول المرض ما احدٍ قدر فـي علاجـه
بدعـا رسـول الله تبهلـل حجاجـه= وقمز كما الضرغام مـا منـه مخبـون
ونابغ بني جعده بساعـة دعـى لـه= من شان قـافٍ حـزة العصـر قالـه
ما طـاح سـنٍ منـه بايـات حالـه= وعمره على المائة سنـه زاد عشـرون
وابو هريره صار احفظ هـل الحفـظ= قدره رفعه الله عـن الجـر والخفـض
ما همنا مـا يزعمونـه هـل الرفـض= واسلافهم تشهد لابن دوس مـن دون
ومنها دعـاؤه للزبيـب بـن ثعلـب= والشاهد آبن عمرو سمـره وأغلـب
اهل السريـه بيـن حالـب ومحلـب= حسامه اقـوى ضـرب ممـا يظنون
وعـن ام ابـان بنـت وازع وابيهـا= عن جدها الواقف وشاهدهـا اخيهـا
يوم ابنها اصبـح مـن نـوادر بنيهـا= من عقب ما هو قبل ساعـات مجنـون
وللقرم ابو حفـص دعـى بالشهـاده= لين الله اعلـى فـي الخلايـق عمـاده
من رمـح ابـو لولـو شهيـد وزاده= حب الرسول ومنكر الحـق ملعـون
ومنهـا دعـاؤه للعمـى فـي نظيـره= يوم اشهـب الايـام أعمـى بصيـره
شاف الصغيـره والوسـط والكبيـره= بدعا الرسول يشوف ما لا يشوفـون
وبن ضمـرةٍ ثعلـبٍ بقـولٍ يقولـه= الله حمـى روحـه بدعـوة رسـولـه
كم فوق سـرج عبيّتـه دش ضولـه= ويسلم وغيره فـي غسقهـا يصابـون
ومصعب ولد شيبه روى عـن أبيهـي= خاف ان هوازن تغلب ابنـا أخيهـي
دون الرسول اصبح سوات البليهـي= فزعه فقط, ما هو بالاسـلام مفتـون
وبدعـا رسـول الله بوقعـة حنينـي= جا للرسول اقـرب مـن الاقربينـي
مسلـم عقيـدة كنـه المسلميـنـي= ما هو من اللي للرسـول يتعـدوون
ولا بن حنيفٍ سهل من عيـن اصابتـه= من اعين الخلـق الله اشفـى ذؤابتـه
بدعا رسـول الله مـا عـاد شابتـه= عيونهـم لـو كلهـم لـه يعينـون
وفـي دعـاه لمـازن بـن العضوبـه= ومازن عليهم مـن صنمهـم عقوبـة
عقب الطرب وملاعبـه كـلْ لعوبـه= غير آي ربـه مـا سمـع مـا يغنـون
وعثمان بن العـاص فيمـا رووا لـه= نهـار ينسـى كـل شـيء يقـولـه
رجـع لـه الله ذاكرتـه محمـولـه= ما عـاد ينسـى والمخاليـق ينسـون
وبدعاه بن رواحـه ارتـاح ضرسـه= والبارقي عروه ومـن مـات غرسـه
ولزيد بـن ثابـت يراعـه وطرسـه= صاروا من الصحه على راس صعنـون
ولعتبـةٍ فـي فتـح مكـه ومعتـب= أمرٍ له اقصـى خاثـر الـدمّ يلتـب
عن معجزاته لـو بنكتـب ونكتـب= والله فلا نملـى مـن البيـر جالـون
وما قاله الفضـل بـن عبـاس عنـه= أن الجبـان بدعوتـه صـار جُنـه
بيـن الأسـنـه دايــمٍ والأعـنـه= ومبطي يموت ان شاف قـومٍ يغيـرون
ومنهـا دعـاؤه للصحابـي حذيفـه= وعلى هـل الـرده بـوادي حنيفـه
ولشعاب يثرب ليـن صـارت مريفـه= من دعوته ناش الحيا اوراق وغصـون
ومهرة جعيل الأشجعي مـن فلاهـا= بدعـا رسولـه بــارك الله نمـاهـا
وبثنا عشـر ألـفٍ وألـفٍ سواهـا= بيعت وهي قبل اقصر الخيـل عرنـون
ولا بـن قرفـه وابـو عـزه وغيـره= وللوليـد الثـانـي بــن المغـيـره
بدعاه صار اللي شكـوا منـه خيـره= والحنظله صارت مـن الخيـر ليمـون
وعن ابن مخمر إبـن عـمّ النجاشـي= ساعة غدت نوقـه ومعهـا المواشـي
بدعـاه عـادت جلهـا والحواشـي= واحيى عليهـا الله رجـال يشـدون
وعن قتلة الساحر وعن فعل جنـدب= أخبر وهندب يا ابيض القلب هنـدب
من سور بغـداد الـى بـاب منـدب= بدعاه مشيون امس هاليـوم مزيـون
وعن بن عنفـوة الشقـي وارتـداده= اخبر وعن راعـي الجمـل والمـزاده
وعن وقعـة الحـره وعـام الرمـاده= اخبر هلـه واللـي عليـه يتواصـون
وإبـن سلمـه عامـرٍ مـن دعـاؤه = خلـى ثمـام ابـن أثــالٍ ورائــه
بأبيض حسـام مـا تدنـس نسائـه= راحوا منه مثـل السكـارى يهيمـون
ودعـاه أن لا تعبـد النـاس قـبـره= ولوفد بن مره عقـب طـال صبـره
يوم الظما يقصر مـن الكـف شبـره= اخضر ورقهـم والسحايـب يهلـون
ودعا رسـول الله لزوجـة جليبيـب= يوم انها من جورهـا شقـت الجيـب
يوم المنايـا تخطـي العبـد وتصيـب= يحيـى جليبيـب وغيـره يمـوتـون
وبدعاه مزق ربنـا عـرش كسـرى= وتخاطفتـه البيـن يمنـى ويـسـرى
وبدعوته يصبح مـع العسـر يسـرا= ويصيـر للعوصـا ملحـى وعثنـون
وعلى أهل مكـه بدعوتـه بالقحـط= ما منهم اللي ما شحطه الفقر شحـط
تسمع لسوط الوقت في وجيههم محـط= ومنهم لحق كرباجه كتـوف ومتـون
وعلـى أبـي رثـوان عاقـر تميمـي= يوم انه اعـرض راحـلٍ مـا يقيمـي
اصبـح مـع الايـام مثـل الهتيمـي= بقعـا تغنـي لـه بدلعـون دلعـون
ثم مكنـه ربـه مـن العبـد نبهـان= واخبر قبل عن حال زيد بن صوحـان
وعن كمّ شيطانٍ لبس ثـوب إنسـان= قال لمعـاذٍ وابـن صخـر يتحـرون
ونويفـل بـن خويلـدٍ مـن دعـاءه= نجـى ولا ينجـى دعـاء ســواءه
وابـن معيـط عقبـةٍ مـن هجـاؤه= ما صاد خير وراح في الوقت مديـون
وفي بن قمئـة وابـن وقـاص عتبـه= دعاه صار وكـل حـيّ شمـت بـه
وما روّحت به سود الايام جـت بـه= في بيضهـا للنـاس مهمـا يكونـون
وعلى قشير في حديـث بـن حيـده= ربي جعله من الدهـر يقلـب ايـده
سيفه ولو هو مـن حديـده جريـده= من دعوته اقبل من العجـز موهـون
وعلـى عتيبـه سلـط الله اســوده= في صحصحٍ بيضه تجي مثـل سـوده
بدعا رسولـه يـوم نامـوا جنـوده= تناوشتـه سباعهـا يـوم يغـفـون
وعلى الشقـي محلـم آبـن جثامـه= قامت طيـور الجـو تنهـش عظامـه
هـذا جـزا مـن لا يثمـن كلامـه= عن عنتر ما اغنى ولا شـيء شيبـون
ومنهـا دعـاه لخيثمـه بالشـهـاده= وعكل وعرينه عقب ما هم بـسـاده
اضحوا **** شلوهـم فـي الحمـاده= تلعب به العقبـان لعـب ام ميسـون
ومنها دعاه لـذروة المجـد الاشـرف= في قتلة الملعون كعـب بـن أشـرف
اللي بهت اصحابـه الغـر واسـرف= لين اقتفى راسه من السيـف شاطـون
ومنهـا دعـاه لثابـت فـي رجولـه= عقب العرج يقمـز بهـا فـي ذلولـه
وبنت الخطيم الذيب منها رمـوا لـهك= راع ثـم ذراع وجنـوب ومتـون
ومعاويه ذو الـراي والـراي فطنـه= دعـى بـأن لا يشبـع الله بطـنـه
وابن الجموح ولو على العيـن قطنـه= بدعـاه صـار أول شهيـدٍ يطـرون
وتلـك العجـوز سبيعـه الاسلميـه= راحت سبب دعوتـه قـش صلبيـه
وابـن سنـان رافــعٍ والصبـيـه= وقيلـة بنـي شيبـان يالـلي تعرفـون
والآن ندخـل فـي ذكـر معجزاتـه= باللي حصل منها وهـو فـي حياتـه
وباللي لقينـا عقـب ساعـة وفاتـه= بالحـق مـا للحـق بـاب وكيلـون
الشمس تحبس له على شـان فرضـه= والجذع له حنْ قبل تاكلـه الارضـه
وصار العسيب حسام طوله وعرضـه= ومصباحهم يوم السرى عود عرجـون
وانشق له وجه القمر في السما فـوق= نصفين كالغرنوق في وجـه غرنـوق
بعثته والساعه كمـا العنـق والطـوق= راعي المقـام اللـي مقامـه يغبطـون
اسرى به الله يم الاقصـى مـن ادنـى= واصبح عن الربْ قاب قوسين وادنـى
لـو فيـه قلنـا ثـم عدنـا وزدنـا= من بعض حقه مـا عطينـاه عربـون
اللي وقف عن سدرة المنتهـى خلـف= ما خاشره في ذاك واحـد ولا ألـف
عند احتدام القاع من وابـل الشلـف= له معجزاتٍ تذهـل اللـي يراعـون
سبح بسم ربه وهو لـم يـزل طفـلي= سوع بشر به وموسـى وذوالكفـل
في البيت الاقصى صار للأنبيـا حفـل= ساعة لفاهم وهْـم خلفـه يصلـون
من شانه الأبكم نطـق مـع لسانـه:= إنه رسـول, وجاهـل فـي الحضانـه
ناغـاه مصبـاح القمـر فـي مكانـه= في المهد واعمامـه لشوفـه يويقـون
كم راهـب شـاف الغمامـه تظلـه= والناس عـز القيـظ والقيـظ علـه
طفل حبيبـات الحصـى سبحـن لـه= ما هـي خرافـة أو علـومٍ يجيبـون
اسم لقتـه قريـش فـوق المقامـي= منقـوش نقـش اغريقهـا للرخامـي
وعصاة ابو عبس انورت في الظلامـي= من نور احمـد أنـورت لونهـا لـون
وابن الحضير اسيد اضـاءت عصاتـه= واضاءت اصابـع حمـزةٍ فـي فلاتـه
والليل مـن فوقـه مضفـي عباتـه= كل اصبع خطرٍ بـه النـاس يسـرون
ورمياته اللي تصيـب دايـم هدفهـا= يوم السيـوف مـن العلابـي علفهـا
كم صخره بإيـده تزعـزع صلفهـا= ثابت وهـم مثـل النعـام يتعـادون
وجبـل ثبيـر يـوم حـرك سكونـه= مشيه بحـرف منـه زلـزل ركونـه
وحرا وأحد كل لـه ارخـى متونـه= له من عظيم الوجد خطرات يمشـون
والسدره اللي مرهـا وافتحـت لـه= والشجره اللي في الطريق اسجدت له
مانيب الوم الشجره اللي عـدت لـه= وكل كائنات الأرض لو جوه يسعـون
يا ظبية فـي وادي الـراك صاحـت= بسم احمد من وجدهـا ليـن طاحـت
ولجفرها راحت وجت عقب راحـت= باحمـد ولا مثـل احمـد لـو يمـارون
له من ملائكـة السمـاوات عـزوه= قاموا معه في حـول عشريـن غـزوه
وكم من طعين به من الرمـح نـزوه= بإيـده لمسـه وراح ماتقـل مطعـون
وبكا الجمل والحجـر ساعـة يسلـم= عليه واغصـان الشجـر لـه تكلـم
اكرم نبي له في سمـا العـرش سلـم= واهل الصليب اللـي تسبـه يعقبـون
شهـد لـه الجنـي بنـور النـبـوة= واسـلام ابـو ذر بمـا قـد تـفـوه
واشفاء كـفٍّ لابـو بكـر ٍ تشـوه= من لدغ ديبان لـدى الغـار يدبـون
وسدّانة الكعبـة بنـي شيبـة الحمـد= بدعاه صاروا هم وهي سيف في غمـد
مفتاحها بيدنهـم عمـد عـن عمـد= الين خلق الله على الحـوض يـردون
يرى بعينه كـل مـا لا يـرى الغيـر= وصوته بلغ ما لا بلغ في الفضا الطيـر
بايدينه احيي حول خمسة عشـر بيـر= ماهن قراح عذب ما هـوب ماسـون
مماتـه اوقــظ نـومـة النايميـنـا= واهـل القـبـور وروّع الغافليـنـا
وناحت عليه النوق فـي طـور سينـا= وكل الملائـك بأحمـدٍ جـو يعـزون
ومن معجزاته صـاد هـي والمعـارج= واخباره بقتلة علي للخـوارج
وذكر بعض ما غـاب دارج وعـارج= فيما اطلعه ربه مـن الغيـب بعيـون
ومن معجزاته فـي حديـث الذبابـه= ما اثبت العلم وعجـز عـن جوابـه
كـل كافـر مـا ينتـداوى صوابـه= لا القول معقول ولا الهـرج مـوزون
عن فتحنا المقـدس وبلـدان فـارس= اخبر وفتح الشام فـي شهـر مـارس
من عاد يجحدها وان ابن آبـو فـارس= شيء حصل كل العرب لـه يعيشـون
وعن فتح مصـر واليمـن والمدائـن= اخبر ومـا قالـه هـو اليـوم كائـن
ياكـم مررناهـن صباحـاً مـسـاءً= من غيـر مـن فيهـا عشـاءً يمـرون
أخبـر بنيـة خمـة مــن جهيـنـة= وما حكى حاطـب بسـوق الظعينـه
وبمـا نـووه اصحـاب مكـه بحينـه= وحلت صلاة الخوف ساعـة يخافـون
وعن الشقي قزمان يـوم القتـر ثـار= اخبر بأنـه رغـم فزعتـه فـي النـار
وفعلا قتل نفسه على اتفه سببصـار= يالله دخيلـك مـن رجـال يخـورون
وعن ابن الاكوع عامر سيـد القـوم= أخبـر بأنـه ميـت ذلـك الـيـوم
وفعلا غدا في ذلـك اليـوم مرحـوم= يـا عـل قبـره روض وردٍ وينسـون
وعن اهل موته وخيـرة مـن قرابتـه= أخبـر بموتتهـم أجلـة صحابـتـه
وعن من استشهد وهـو فـي جنابتـه= اخبر وعن من فـي بحرهـا بيغرقـون
عمر الخلافـه يـا حسيـن الحقيقـي= احصاه في عشـر وعشـر بالطريقـي
مع عشر فيها يصيـر مـا لا يليقـي= يـا فتنـةٍ اطرافهـا مـا يسـبـون
وهيي خلافـة الاربـعـه الطاهـريـني= عمر وابو بكـر وعلـي نـور عينـي
وعثمـان بـن عفـان نـاد الجبينـي= بطيبهـم لازالـوا النـاس يحـكـون
وعن هلاك ثنيـن مـن جملـة النـاس= بسبة علي اخبـر علـي مـن الـراس
اللـي يسبونـه وهـم ارذل النـاس= واللي تقدس لـه وهـم مثلهـم دون
ياللي تسب حسيـن وتسب ابـو بكـر= ثنينهـم منـا لـه الحمـد والشكـر
لكنكـم نـاس بهايـم واهـل مكـر= فـي الجاهليـه كنكـم لا تـزالـون
خلوا كـلام اهـل العبـي والعمايـم= واستذكروا التاريخ مـا انتـم بهايـم
اهل العمـم خلـوا نساكـم غنايـم= واهل العبي للكره والبغـض يدعـون
واحد يكفر يحسب الدين حقه= وواحد عطى بعض البشر فوق حقه
مالي مع الاثنين زمل وحقه= ماغير دايم في بعضهم يسبون
وعن الحسـن واصلاحهـا الفرقتيـني= اخبـر وانه خيـرهـم أجمعيـنـي
وعن قتلهـم فـي كربـلا للحسينـي= اخبر واخبـر عـن مزقـرة الافيـون
وعـن ثنيـن مـن ثقيـف بالاذكـار= هـذاك كـذاب وهـذاك جـبـار
مختارهـم غـار وحجاجهـم نــار= وثنينهـم فـي النـار فيمـا يعـدون
ويوم رقاب العيـس مثـل العسـاوه= وعيون اهـل مكـه عليهـا غشـاوه
انـزل عليهـم مـن إلاهـه تـلاوه= آي بهـا كـل المخاليـق يـقـرون
آي تعجـز كـل كاتـب وشاعـر= تذهل عقول اهـل البقـر والأباعـر
قرآنـه المقـروء عـنـد المشـاعـر= دلاائل الاعجـاز بـه لـو تـأنـون
يشفي من الوسواس من ظنهـم ظـن= واللي سدح راسه على يابـس الشـن
ويشفى به اللي فيه مـس مـن الجـن= تلاوته تذهـب حـزم كـل محـزون
ستر من اهل السحر واهـل الكهانـه= واهل السيوف الغشم واهل البطانـه
واهل العيون الشهب واهـل اللعانـه= والحسد واهل الحسد واللي يكيـدون
هـذا نـبـي الله زيــن الـمـواري= اكـرم عبـاد الله طريـا وطــاري
تبكي عليـه وحوشهـا والضـواري= وفيه اهل صنعا لأهل بصرى يعـزون
اشرف شريفٍ عاش فـوق البسيطـه= في الوقـع المؤلـم ووسـط الخريطـه
عليه ثوبي بأحمر الدمع اخيطـه= حسبي على من لابن هاشـم يسيئـون
هذا محمـد سيـد الإنـس والجـان= واخير من عاشوا على الارض من دان
منقذ بني الانسان من ظلـم الانسـان= والجن مـن فضلـه عليهـم يحجـون
اكرم بنـي الانسـان جـدٍّ ووالـد= وذكره مدام الناس حييـن خالـد
ولا يسبـه الا ضايعـيـن المتـالـد= رباتة الخنزير وابليـس ملعـون
اختصـه الله بالرسـالـه وزكــاه= ليـثٍ كـأن البـدر طلعـة محـيـاه
أنقذ هل الناقه وأنقـذ هـل الشـاه= وحثالةٍ من حـول الاصنـام يومون
يا شيب عيني كيـف مثلـه يعـادى= ويا كيف مثله في الوعر مـا يشـادى
وكيف بن عم القرد كيـف يتمـادى= في سبه احمد قدمنا يـا هـل الشـون
هـاك النبـي الله يـكـرم مقـامـه= راع المـقـام المنتظر والمقـامـه
يا عابـد الخنزيـر مـا مـن كرامـه= ملعون واللي مـا يعاديـك ملعـون
وسبـك لأحمـد مـا ينـزل سمـوه= يرفع مقامـه وانـت مثـل المشـوه
احمـد يعرفـه فيكـم اهـل المـروه= والا انت ما تسوى ثمن كيس صابـون
يبقى محمد فوق مـن فوقكـم فـوق= والعود باباكم من الضيـم مصفـوق
حاخام خلاكم لكـل شيـن رقـروق= لا هـز راسـه معـه قمتـم تهـزون
هـذا نهايـة أول الـلـي كتبـتـه= في سيرة أطهـر سائـر الخلـق نبتـه
واللي غدت به سود الايام جـت بـه= لا ابو رياجيـل عـن الحـق ينحـون
أبديت مـا أملـى ضميـري عليـه= فـي اول بيـوت السيـرة الهاشمـيـة
الله يجازيـنـي بشفـاعـة نـبـيـه= لامي ولي وابـوي فـي يـوم يلفـون
يا كثر ما قصـرت فـي حـق ربـي= طرد الهوى عن درب ربي لعـب بـي
مالـي سـوى ربـي ولا غيـر ربـي= ينجيني اليا صرت للمـوت مرهـون
يا كثـر مـن ملـوا مقابـل بهيجـه= وغيـدا وصافينـاز مـدري خديجـه
وملـوا كثـر سجاتهـم يـا فريجـه= من باب بلقيس إلـى سـور سيمـون
هـذا كـلام قلـت فيمـا اريـدي= وان كان انا زليت ما هـوب بإيـدي
ماني مـورخ كـل حكيـه وكيـدي= مانيب ابن خاقان والا بـن خلـدون
وصلى الله الوالى علـى احمـد وآلـه= اهـل العلـوم الطاهـره والشكالـه
عـداد مـا تمطـر سحايـب خيالـه= وعداد من فـي بيـت ربـي يلبـون
.:: إعلانات الموقع ::. 
قصيدة الفراعنه في الرسول صلى الله عليه وسلم
العرض العادي
