حبيت انقل لكم ردية تأكد إن فارس بن عيبان شاعر لا يستحق التجاهل
هذي ردية بينة وبين الشاعر حسين القفيلي القشانين وانا اشهد ان فارس حصان ابن حصان
يقول فارس
لامن زمـــانك شـان و أضناك بالحيـــل =و تزايمــت فيـــك الهمـــوم الثـقيــــله
ارفــع يدينـــك بالدعاء و التهـــاليــــــل =و إخلص رجاك لواحــدٍ نرتجـــي لـه
كم واحدٍ عـــانى عـذاب و غـــرابيــــل =تسعفه رحمـة من يســــوق المخيــله
أيوب شف أيــوب عقــــب البهــاذيــــل =بالصبــر و أسباب الـدعـاء زان ميـله
في قصته أسمـى المعـــاني و تمثيـــــل =للعــــابــد اللـــي فـــي يقيــنــه دليـله
و اللـي تـوكل لـــه مــن الله توكيـــــــل =ويفــرج عليـه بقــدرتــه ثــــم يعـليــه
بس أنت داوم بالدعـــاء واقنـت الليـــل =وتلقى الفرج من عبقهــــا لك حصيـله
ولا تقنــط الرحمـــه ترهـــــا تســـاهيل =ولا لا تقــــول إن كربتــــك مستحيـله
ورافــق كتــاب الله قـرايــه و تـرتيـــل =فيــه الشفــــا للنفـــس لاهــي عليــــله
من بعدهــــا دور مـا بيـن الرجــاجــيل =اللــي علــى مــا قيـــل يســوى قبيــله
خلـــه شويـــرك في الليـالي المقــــابيل =وإتــــرك هذاك اللـي يجض بعـــويله
ترى الرجال أنواع مثــل المحــــاصيل =شي ٍ يفيــــد وشــــي يتـرك نثيـــــــله
وإما لقيت الحــل مـن راس حلحيــــــل =والا تـــــراه بيـسنــدك يــــا زميــــله
ويسخـــره ربك على الهــــم و الويــل =ويكــــون لك مثــل البــــرد فــ المليه
وإحرص عليه إن حـده الجور والميــل =وحذراك تنــكــر يالسنــافي جميــــله
ترى الجحـود أمقــت طبــاع المهابيــل =ومن لا يحســب الدايــــره مـا تجـيله
وإزبـاد هرجـــي فــي سيــاق التمـاثيل =ياللي غشــاك الهــم وأزريــت شيــله
قربك من الله مع مخــاوى المشــــاكيل =هــي فــي جــلا ضيـم الهموم الكفيله
فيا راكـــبٍ من عنـــدنا بــالمــــراسيل =إســر وتــوكل بالـــذي ننحـــني لــه
اكفـخ هَمــــام ولا تهـــــم العــــراقيــل =من فوق ما تطـــوي المسافات ويـله
سمــي (بنــورامـــا) تميـــز وتـــدليــل =عن كــل مركــب وردوه بمـــديــله
ســـاعة تشـــوفه يسلـب العقــل ويهيل =منك العيـون الشــاخصه و الذهيـــله
ويبهرك في شكله وأدق التفـــاصيــــل =صمم لأصحـاب السمـو والفضيــــله
وأكبر طموح أهل الترف والمنــــاويل =وحلم القنــوع اللي قصــر عنه حيــله
لبــليتته قيـــمه و معنــــى وتفضيـــــل =لــــو هي مجـــرد لوحــة(ن) مستطيــله
تفضيلهـــا بحروفهــا عنــد تسجيـــــل =مليكيته يــــوم أنشـــرى من وكيــــله
فيها حروف أهل القــَرى للمداخيـــــل =(ي ا م) الكـــرام معــدلة كـل ميــــله
ومـا مشتـــراه اقصـــاد وإلا بتمـــويل =مدت كريــم إليــا عطــى زاد كيــــله
من لابــتي أهل القنـــــا والمصــاقيــل =آلاد حــارث بن كعـــب راس جيـــله
خلقـــوا نــداد الكــــــايده والمثـــاقيــل =وللطيــــب منبـــع ســـايغ بسلسبيــله
وإن عقدت روس الفتــــل والمحابيــل =بأفعــالهـــم فــــل العقـــــد و الفتـيــله
عليه يالمندوب مــن دون تــــأجيـــــل =ملفـاك أبــو مشاري عريــب السليـله
نعم الخـوي (حسيـن) من ترثت قفيــل =صلـب القشــانيــن الزحـول النـبيـله
قوم ٍ تعلــوا صهـوة المجــد والخيــــل =و يــاكـم تــراكــوا للجســام المهيــله
فـــي طيبهم وصف السحاب الهمـاليل =وفي بـــاسهـم سقـــم الكبـود المغيـله
وإن جيـت للشــور المحكحك قنــاديل =تجــلا العســـام و للغــداري محيـــله
كبيـــرهـــم مـا شبـهه كـــود بسهيـــل =تشـبيــه واقـــع مختصر لــه دليـــله
دليــله إن المرجلــه ورث مــن جيـل =مضي بكســـب علـومها والنفــيـــله
وجـدودهم مــا ورثوا غيــر مـا قيــل =عنه الفخـر والعـــز واسبـاب نيـــله
ويا كثــر ما هم سطروا من أفــاعيــل =ترقى بهــــم حد السماء كـــل ليـــله
فلا جيـت أبو مشاري رفيع المنـازيل =ورَحَب عقــاب النــايفه والطـويـــله
سلم عليه إعــداد رمـــل الغــراميـــل =و عد المطر واعـداد ما سال سيـــله
سلامٍ أزكى من شــذا البـــن والهيـل =وأندى من العشب الخضر فالخميله
ينســاق لـه قــدر ومعــزه زرافيـــــل =والقصد وصــله والقوافـي وسيـــله
ويرد حسين
لامن زمانك شـان هـم وتهاويـل= وجاتك همـوم ٍ كالجبـال الزحيلـه
تبرك مثل برك الجمـال المحاميـل= وتدوس قلب ٍ صـار همـه عميلـه
أطلب رفيع الشأن راعـي المخاييـل= منشي السحاب أللي تزايـد هميلـه
حامي حرم بيته وقاهر هـل الفيـل= الواحـد المعبـود منجـي دخيـلـه
يارب لي صـارت دروبـي عراقيـل= يـارب تجعلهـا علينـا سهيـلـه
يـارب يامنـزل قـران وتـأويـل= حتـى نفـرق بيـن خيـر ورذيلـه
أعوذ بك يـارب مـن شـر ماقيـل= وإبليـس وفعولـه ودرب الفشيلـه
إبليس من ساعد على جُـرم قابيـل= حتى قتـل هابيـل وأصبـح قتيلـه
من بعدهـا مـادام جـات التماثيـل= أبيـوت شعـر وا صلتنـي جزيلـه
من شاعرمن راس قـوم ٍ حلاحيـل= آلاد حـارث كاسبـيـن النفيـلـه
يسجـل التاريـخ جيـل بعـد جيـل= غاراتهـم بسيـوف هنـدٍ صقيلـه
وإن ثارت الهيجاء وطارت دساميـل= ثم نقضن بيـض العـذارى الجديلـه
تارد حياض الموت ورد المشاميـل= على قليـب العـد وقـت المقيلـه
ياجعـل تفداهـم وجيـه مسافـيـل= ضعف النفوس أهل العلوم الهزيلـه
ولبيه يافـارس تطيـب المواصيـل= ابشر بعزك فـي العلـوم الأصيلـه
ياشوق شقـر مشطـات المجاديـل= أم العيـون الناعسـات الكحيـلـه
قافك يابـو هيـاف خلانـي أعيـل= والرجل تـأوي لـه لماجـاه عيلـه
مدري علي تشكي غرام وبهاذيـل؟= فالحـب مـر بالليالـي الطويـلـه
كم شيخ قومٍ مـن رجـال فطاحيـل= ينـوح لشجـون الحمـام وهديلـه
وكم فارسٍ خيّال فوق أدهـم الخيـل= ويضيع لوشاف الرمـوش الظليلـه
في عبس عنتر عاش مـر التناكيـل= وابـن الملّـوح ذاق فرقـى خليلـه
وإن كان تشكي الدين سقنا المراحيل= ونشيـل حملـك لايهمـك ثقيـلـه
وإن كان شفك فـي دلال ومعاميـل= والبن الاشقر فائـح (ن) زنجبيلـه
شبيت ناري وأنـت فـال الفناجيـل= فنجالهـا لـول حـرام ٍ تجـي لـه
ولك الكرامه عندنـا حايـل الحيـل= عاداتنـا ماهـي بوجبـة بليـلـه
وإن كان شفك بالقنـص والتجاويـل= أبشر وأنا بالدار مـا ابغـى دليلـه
طعامنـا , وسلاحنـا , والدرابيـل= وسجة قدم تبـري القلـوب الغليلـه
نسوقهـا لـي حـد دار المناهيـل= شرق ٍ وغرب ٍ فـي بـلاد ٍ جميلـه
وإن كان هاوي للبحـر والأساطيـل= نرسي على مينـاء يسمـى مليلـه
بالأطلسي تهنـى الكبـود المغاليـل= ونشوف وقـع أجدادنـا والهويلـه
عند المظيق وبيـن روس النهاليـل= يوم العرب شبـت بـراس الفتيلـه
وإن كان تبغاها علـى ديـرة النيـل= وتطرب لشوف آثار مصـر ٍ ونيلـه
دار بها رمسيـس والعالـم زويـل= وأهـرام فـي بنيانهـا مستحيـلـه
وإن كان تبغى الجو ماحـن مكابيـل= وكفوفنـا ماقيـل عنهـا بخيـلـه
والله يقدينـا نـعـرف المداهـيـل= والطيب مانرضـى بـدرب ٍ بديلـه
وهرجٍ ومـرجٍ وإنحـرافٍ وتطبيـل= عـار علينـا فـي سلـوم القبيلـه
نلبس شماغ , ومرعز, وثوب تفصيل= ماحـن نحـب البالطـو والفنيـلـه
ولا نحـب المسخـره والزغالـيـل= وحيوا سميره وافرحوا فـي كميلـه
نخاف من قولـة شبـاب ٍ مهابيـل= راحوا وصاروا في عـداد الشليلـه
يالله تجمعنا علـى الخيـر وتزيـل= تزيـل هـم الوقـت يالله تزيـلـه
وآشوف أبو هياف مايكفـي إيميـل= وجهاً لوجه يزورني واحتظـي لـه
واهديه فل وعنبـر وكـادي إكليـل= بستـان ورد فايـح فـي خميـلـه
معطـره ومقدمـه فـي منـاديـل= من كل نوع وكـل لـون وفصيلـه
مـع نسيـم بـارد يبـري الويـل= من كل نوع وكـل لـون وفصيلـه
صح لسان فارس الشعر وخوية