» فمان اللي ذبح قلبي وسار بموكب الدمعات

[سيف قطعان]

وش أقسى من ضياع انسان
وسط أهله وخلانه!
أشوف وجوه مألوفه
أحسها مني وفيني
أثاريها مـ تعرفني
ويعيد القلب غلطاته
على كرسي خشب أجلس
وأتأمل غروب الشوق
بعدها أسدل ستارة ْ
جروحي والألم والآه..
ملامح وجه هالغربه
تخوفني
تبكيني
تحسسني بإن حبي
حكايه مالها عنوان
وأجلس بعدها وحدي
بصومعتي وألاقيني
أرددها أناشيدي
يا نشوة حبي اللي كان
عشقتك يا بعد عمري
زرعتك في بساتيني
وظللتك بدقاتي
وغنيتك على يا دان
وقهويتك باحاسيسي
بمجلس قلبي الولهان
وبخرتك دفى حبي
وبديتك على ذاتي
بعدها غاب اشعاعك
وماتت زهرة اللوتس
بدون أعذار مقبوله
طفت يدك قناديلي
وأجهض قلبك القاسي
بقايا ثورتي وياك
فمان الجرح يا كلي
فمان الصمت بأجراسي
فمان اللي ذبح قلبي
وسار بموكب الدمعات